სანამ ჰაერის ტემპერატურა კვლავ 30 გრადუსს აჭარბებს, სიცხეზე საუბარს თავს ვერ ავარიდებთ. ეს საკითხი აქტუალურია არა მხოლოდ ამინდისა და სამოგზაურო გეგმების, არამედ ავტომობილების ნაწილების განხილვის დროსაც.
ზაფხულში ავტომობილის შესაბამისად მოვლა მნიშვნელოვანია, რადგან სასწორზე თქვენი კომფორტი და უსაფრთხოებაა. სწორად მომზადებული მანქანა კი არა მხოლოდ ავარიულ სიტუაციებს აგარიდებთ, არამედ დაგაზოგვინებთ დროს, თანხასა და ზედმეტ ნერვიულობას.
რატომ არის აუცილებელი ზაფხულისთვის ავტომობილის მომზადება?
სიცხეში იზრდება ძრავის გადახურების, საბურავების დაზიანების, კონდიციონერის მწყობრიდან გამოსვლისა და სხვა სერიოზული პრობლემის შექმნის რისკი;
დროულად აღმოჩენილი პრობლემა ხშირად მარტივად მოსაგვარებელია;
კომფორტული და უსაფრთხო მგზავრობა მხოლოდ ტექნიკურად გამართული ავტომობილით არის შესაძლებელი.
რომელ სისტემებს უნდა მიაქციოთ განსაკუთრებული ყურადღება?
ძრავის გაგრილების სისტემა
შეამოწმეთ ანტიფრიზის დონე და მდგომარეობა;
დარწმუნდით, რომ ტემპერატურის მაჩვენებელი ნორმაშია;
საჭიროების შემთხვევაში ანტიფრიზი შეცვალეთ ან შეავსეთ.
თუ გაგრილების სისტემა გამართულად არ მუშაობს, არსებობს ძრავის გადახურების და მისი სერიოზულად დაზიანების საფრთხე.
კონდიცირების სისტემა
დარწმუნდით, რომ კონდიციონერი ეფექტურად აგრილებს ჰაერს;
დაგეგმეთ ვიზიტი სპეციალისტთან - შეამოწმებინეთ კომპრესორი და ფილტრები.
კონდიციონერის გაუმართაობა მხოლოდ დისკომფორტი არ არის - სიცხე შესაძლოა, მძღოლის ყურადღების გაფანტვის ან თავბრუსხვევის მიზეზიც კი გახდეს, რაც საავარიო სიტუაციის შექმნის რისკს ზრდის.
საბურავების მდგომარეობა
შეცვალეთ ზამთრის საბურავები;
შეამოწმეთ პროტექტორის სისქე, რომელიც 1,6 მილიმეტრზე ნაკლები არ უნდა იყოს;
რეგულარულად აკონტროლეთ საბურავების წნევა - გაითვალისწინეთ, რომ სიცხეში ჰაერი ფართოვდება.
აკუმულატორი
სიცხეში ელექტროლიტი ორთქლდება, კოროზია ჩქარდება და ბატარეის დაძველების პროცესი უფრო სწრაფად მიმდინარეობს.
სამუხრუჭე სისტემა
აუცილებლად შეამოწმეთ სამუხრუჭე სისტემა;
თუ დაგეგმილია მთაგორიან გზებზე მგზავრობა ან დატვირთული ავტომობილით გადაადგილება, არ უნდა დაგავიწყდეთ, გაგრილებისა და მუხრუჭების სითხე რეგულარულ კონტროლს საჭიროებს.
მანქანის ვიზუალი და სალონი
გარეცხეთ მანქანა რეგულარულად და დაამუშავეთ ცვილით, რათა მზის სხივებმა საღებავი არ დააზიანოს;
გამოიყენეთ მზისგან დამცავი საფარი (მინებისა და საჭისთვის);
გაწმინდეთ სალონი შესაბამისი ანტიალერგიული ხსნარებით - გაითვალისწინეთ, საფარი ტექსტილისაა, ტყავის, პლასტმასის თუ შერეული.
როცა ყველა ამ ნაბიჯს გაივლით, სანამ გრძელ გზას დაადგებით, საწვავის ავზი შეავსეთ და სამგზავრო ნივთები მოიმარაგეთ. ასე საზაფხულო მოგზაურობისთვის თქვენი და თქვენი ავტომობილის უსაფრთხოება სრულად იქნება უზრუნველყოფილი.
სისუფთავე და სიგრილე თქვენს კომფორტს ემსახურება.
დაიცავით წესები - ისიამოვნეთ მოგზაურობით და თქვენს მანქანას ზაფხული რთულად არ მოეჩვენება.
