თუ უკვე დარწმუნდით, რომ ავტომობილი ტექნიკურად მზადაა ზაფხულის სეზონისა და ახალი თავგადასავლებისთვის - აკუმულატორი გამართულია, გაგრილების სისტემა ჩართულია, ჰაერის ფილტრები შეცვლილი გაქვთ და ჩვენს წინა ბლოგებში განხილული მნიშვნელოვანი საკითხებიც გაითვალისწინეთ, ახლა დროა, მანქანის შიდა სივრცის კომფორტზე იზრუნოთ.
ჰაერის ცირკულაცია და სიგრილე
სანამ სხვა დეტალებზე გადავალთ, პირველ რიგში, ჰაერის მოძრაობასა და ტემპერატურას უნდა მივხედოთ. შესაძლოა, თქვენი კონდიციონერი იდეალურად მუშაობდეს, თუმცა დამატებითი საშუალებები არასოდესაა ზედმეტი:
USB ქულერები და მინი-ვენტილატორები
ხელს უწყობს ჰაერის მოძრაობას, განსაკუთრებით მაშინ, როცა მანქანა გაჩერებულია ან უკანა სავარძლებამდე კონდიციონერის ჰაერი კარგად არ აღწევს. ეს მოწყობილობები კომპაქტურია, ნაკლებ ენერგიას მოიხმარს და მარტივად თავსდება მცირე სივრცეში
ჰაერის გამწმენდი
ზაფხულის მშრალი დღეები ხშირად მომატებულ მტვერსა და ალერგენებთან ასოცირდება. ავტომობილისთვის განკუთვნილი ჰაერის გამწმენდები ეფექტიანად აშორებს მათ და უზრუნველყოფს სუფთა, სასიამოვნო გარემოს
სალონის არომატიზატორები
სასიამოვნო სურნელი არა მხოლოდ კომფორტს, არამედ განწყობასაც განსაზღვრავს. შეგიძლიათ, შეარჩიოთ ნებისმიერი ფორმის - ხის, სპრეის, ეთერზეთის ან გელის არომატიზატორი და თავიდან აირიდოთ ჩახუთული ჰაერი და უსიამოვნო სუნი
სიცხისგან დაცვა
მზის პირდაპირი ზემოქმედება ხშირად იწვევს იმ მდგომარეობას, როცა ავტომობილის სავარძელზე დაჯდომა ან საჭის მართვა რთულდება. ამის თავიდან ასაცილებლად სალონის ზედაპირების დაცვა აუცილებელია:
სავარძლებისა და საჭის გადასაფარებლები
ღია ფერის, მიკროფიბრის ან ბამბის ქსოვილის საფარები სასიამოვნოა შეხებისას და მნიშვნელოვნად ამცირებს გადახურების რისკს. თუ თქვენს ავტომობილს აქვს ხელოვნური მასალის სავარძლები, მათი დაცვა გელიანი ბალიშებით ან სუნთქვადი ქსოვილით დამზადებული გადასაფარებლებით მნიშვნელოვნად გაზრდის კომფორტს
წყლის გაგრილება
გზაში ყოფნისას აუცილებელია წყალზე წვდომა და მისი სიგრილის შენარჩუნება.
წესრიგი და ორგანიზება
გზაში ყველაფერი რომ მარტივად მოიძებნოს და ავტომობილი „მინი-საწყობად“ არ გადაიქცეს, ყურადღება წესრიგზე უნდა გავამახვილოთ.
სალონისა და საბარგულის ორგანაიზერები
დაგეხმარებათ ნივთების მოწესრიგებულად განაწილებაში. განსაკუთრებით გამოსადეგია ოჯახური მგზავრობისას ან მაშინ, როცა თან ბევრი მცირე ნივთი მიგაქვთ
პატარა ურნა ნარჩენებისთვის, ხელსახოცები და ჭიქის დამჭერები
ეს მარტივი დეტალები ხშირად გადაგვარჩენს არეულობას, დაღვრილ სასმელს ან სხვა უსიამოვნებას. სასიამოვნოცაა, როცა მანქანის შიგნით ყველაფერი თავის ადგილას გხვდებათ
გართობა და მუსიკა
როცა მანქანაში ყველაფერი მოწესრიგებული და სუფთაა, დროა, იმაზეც ვიფიქროთ, როგორ გავატაროთ ეს დრო სასიამოვნოდ. მუსიკა ყოველთვის საუკეთესო თანამგზავრია - განსაკუთრებით მაშინ, როცა შორს მივდივართ ან საცობში აღმოვჩნდებით.
აუდიოსისტემის გამართვა, AUX და Bluetooth მოწყობილობები
მუსიკის მოსმენა მარტივია, როცა მოწყობილობა ტელეფონთან უკაბელოდ არის დაკავშირებული. Bluetooth მოდულები ან AUX კაბელები ამარტივებს ამ პროცესს
ტელეფონის დამჭერი და დამტენი
თუ რუკით სარგებლობთ ან მუსიკა ტელეფონით გაქვთ ჩართული, მისთვის სტაბილური დამჭერი დაგჭირდებათ. ტელეფონის მუდმივი გამოყენებისას კი აუცილებელია დამტენიც
ზემოთ ჩამოთვლილი დეტალები შეიძლება წვრილმანებად მოგეჩვენოთ, მაგრამ მათი ერთობლიობა ქმნის იმ გარემოს, რომელიც ჩვეულებრივ მგზავრობას დასვენებად გადააქცევს.
თუ თქვენს ავტომობილში ეს ყველაფერი უკვე უზრუნველყოფილია, ისღა დაგრჩენიათ, ჩემოდანი ჩაალაგოთ და სამოგზაუროდ წახვიდეთ, ან სამსახურისკენ მიმავალ გზას დაადგეთ. კომფორტი ყოველდღიურადაც ძალიან მნიშვნელოვანია, განსაკუთრებით მაშინ, როცა საცობებში დიდი დროის გატარება გვიწევს.
